Xelu Neira
Ye conocío que’l Plan Parcial d’Urbanización de Cabueñes nun presenta, como denunció la Plataforma Ciudadana contra el Muro de Cabueñes, informe d’impactu mediuambiental. Los promotores únicamente dediquen unes páxines de la Memoria a describir, por enriba, les “Condiciones del Medio Físico” (apartáu 1.3.2.).
Son munches les coses que queden sin mencionar nesi informe, tal paez que los autores nun tuvieron pola zona o sólo vieron rates y llagartexes, de toes maneres, na páxina 32, onde falen de los mamíferos, indiquen que “ puede señalarse la presencia menos frecuente de la comadreja (Mustela nivalis), la garduña (Martes foina) y otras especies predadoras”, pa concluir sin embargo más abaxo, na páxina 37, que “ la influencia de las actuaciones previstas sea baja” y finalicen con que “se puede considerar que el impacto global de la actuación respecto al medio abiótico, biótico y paisaje como compatible”.Dicen que una imaxen val pol mil palabres, esta "garduña" que apaez atropellada na carretera nacional 632, a la altura de la Quinta del Ynfanzón, fue fotografiada’l pasáu 31 d’ochobre de 2008 a les 9 de la mañana.
Dellos allegraránse, ye un animal que nun tien bona prensa per equí, mata les pites y de xuro que más de ún camentará que, como los llobos, o los osos, meyor si se desanicien y esapaecen dafechu.
Pero hasta ayeri como quien diz, esti guapu y xabaz animal taba vivu entre nosotros. Y, como los llobos y los osos, merez protección y respetu.Cuando fagan la carreterona y los bloques de pisos, cuando Cabueñes sea urbana como pretenden otres “garduñas” humanes en sin escrúpulos y famientes de dineru fácil , ya nun veremos más, nun habrá otro que cemento y formigón, y sinceramente, aunque me cueste alguna pita, prefiero, como hasta agora, la mio garduña de Cabueñes. Descanse’n paz.
Publicado en la FUEYA VECINAL núm.8, de febrero de 2009, órgano de expresión de la Asociación de Vecinos de Cabueñes-La Pontica
