l'Alcaldesa firmó contra'l Muru de Cabueñes


Compromisu de Xixón pide la rectificación total de la política urbanística de la ciudá


Daniel Fernández como portavoz de Compromisu por Xixón, federación que xunta a independientes y afiliaos de Bloque por Asturies y Unidá Nacionalista Asturiana, señaló esti domingu [29/7/2012] que la sentencia del Tribunal Supremo (TS) qu'anula definitivamente el Plan Urbanísticu de 2007 y nel que se basa parcialmente el PXO de Xixón danguaño, obliga a una rectificación dafechu del urbanismu de la ciudá.

Dende Compromisu por Xixón reiteraron «hasta l'aburrición que l'anterior y l'actual PXO yeren illegales y que poníen a Xixón na mayor de les inseguridaes xurídiques posibles en materia d'urbanismu, y eso ye lo que vien a ratificar la sentencia del TS».
Dende Compromisu soliciten públicamente a Foru «qu'empiece a trabayar nun PXO nuevu que tenga en cuenta la participación vecinal pa solucionar l'entuertu creáu por PSOE e IX».
Agora, añade Fernández, «nun queda otro que facelo a les carreres y con unes consecuencies más graves que si hai un añu yá nos punxéremos con ello. Políticamente Foru yá s'opusiere públicamente a munches de les midíes urbanístiques tomaes, firmando l'Alcaldesa, Carmen Moriyón, contra'l Muru de Cabueñes cuando yera candidata, posiciones que depués de tomar posesión del cargu escaeció de secute como fizo tamién cola mayor parte de les promeses que ficiera en materia d'urbanismu".


Espublizao en Les Noticies el 29 de xunetu de 2012