La “Sanjurjada” del PGO

La “Sanjurjada” del PGO


Conozse col nome de “Sanjurjada” l’intentu de Golpe d’Estáu que, nel 1932, promovió’l Xeneral Sanjurjo escontra la recién afitada República Española. Adulces si llevaba un añín de vida, cuando yá los militares africanos, la derechona y la Ilesia principiaron a combatila de toles formes posibles. Una d’elles, claro, la de les armes, como esta “Sanjurjada”, que fracasó dafechu, o la yá trunfante en 1939, depués de tres años de guerra y un millón de muertos. Por cierto, que en cuantes llegó la derecha al gobiernu de la República (1933), lo primero que fizo fue indultar al Xeneral Sanjurjo que marchó al esiliu portugués, dende onde siguió conspirando escontra ella.

Nun tien nada que ver, llóxicamente, esta otra “Sanjurjada” de la que voi falar, y sólo la llamo asina pa xugar con un títulu yá consagráu pola Historia. Porque esta otra a la que me refiero ye la protagonizada por don Pedro Sanjurjo, agora na menos que Presidente de la Xunta Xeneral del Principáu, y va un par d’años conceyal d’Urbanismu del Ayuntamientu de Xixón. Como tal, él fue’l másimu responsable del Plan Xeneral d’Ordenación, el famosu PGO qu’agora acaba de ser anuláu por decisión xudicial.

Los planes xenerales d’ordenación son la principal responsabilidá d’un gobiernu municipal, pues al rodiu d’ellos, van afitándose toles demás lleis y actividaes. Ye importantísimu como impulsu económicu y comercial, pues marca les regles de xuegu pa estayes como la construición y toles que se deriven d’ella, y yá sabemos lo importante qu’esto ye pal aliendu monetariu y de gastu de les economíes particulares. Pero quiciabis lo que a mí me paez más importante ye que’l PGO define’l tipu de ciudá del futuru. La clas de ciudá que queremos tener. Pue ser una ciudá esclusivamente “desarrollista”, de crecimientu urbanu, d’invasión d’espacios verdes y rurales, o pue ser una ciudá “vivible”, racional, onde la xente s’atope bien y onde nun esapaezan los llugares tradicionales, nin les actividaes tradicionales, nin los restos qu’entá queden de lo que fue la vida de los nuestros mayores (horros, paneres, llavaderos…). Poro ye mui importante, nesi diseñu, respetar el cinturón verde qu’arrodia la ciudá, que nun pue ser esbarrumbáu nin invadíu pol cementu y l’hormigón d’urbanizaciones que, a la vista ta, nun tienen munchu sentíu nestos tiempos que cuerren.

Eso ye, más o menos, lo que les asociaciones y coleutivos de ciudadanos-y pidíen al ayuntamientu nel 2005, cuando los tribunales anularon per primer vez el PGO, con doña Paz Fernández-Felgueroso d’Alcaldesa, y lo que siguieron pidiendo en 2010, con doña Paz Fernández-Felgueroso d’Alcaldesa y don Pedro Sanjurjo de conceyal d’Urbanismu. Yá vemos qu’esti PGO siguió’l mesmu camín qu’aquel, siendo anuláu polos tribunales. Y lo que queda mui nidio nel fallu del Tribunal Superior de Xusticia d’Asturies ye lo mesmo que la vez anterior: nun se tuvieron en cuenta les alegaciones de los vecinos. Más entá: qu’hubo “indefensión” por parte de la ciudadanía a la hora d’aprobar esi plan d’ordenación. Que nun se permitió la participación ciudadana nel mésmu. Eso de lo que se quexaron repities veces, los vecinos de Vega, de Cabueñes, del Muselín y otros munchos. Eso traime a la memoria’l lema del despotismu illustráu: “Too pal pueblu, pero ensin el pueblu“. Cola agravante de qu’estos nuevos “déspotas” nin siquier son illustraos.

Ye enorme’l perxuiciu que se causa a la ciudá con esi comportamientu despóticu. Agora hai que se retrotraer unos cuantos años y entamar de nueo les actuaciones, nun momentu económicu y social tan complicáu como’l presente. Y lo más curioso del casu ye que nu se ve, per nengún llau, el “propósitu de la enmienda” tan necesariu pal futuru, pa nun volver a cayer nos mesmos errores. Y dígolo porque, anque paeza una “humorada”, la rempuesta del PSOE a l’anulación del “so” PGO fue dicir que la culpa fue de l’actual alcaldesa de Foro, por nun defendelu con más enfotu. O seya que taba mal fechu, pero había que lu defender con enfotu. Asina a onde vamos ye a un sitiu que se diz muncho n’Asturies: “al cagayán”.


Publicao nel blogue Trabayu de Campu de Vicente Garcia Oliva el 2 de marzu de 2013