Qué tendrá que ver la destitución de Pepe el Ferreiro col procesu a Txomín Goñi y con Cabueñes y les ofenses a Paco Cadórniga
Xelu Neira, 30-1-2010
Tuvimos la ocasión de visitar recientemente'l Muséu Etnográficu de Grandas de Salime, el pasáu 24 d'ochobre de 2009, na excursión que organizó l'Asociación de Vecinos de Cabueñes -La Pontica.
Na foto vése la presidenta,
Ana García escuchando les esplicaciones que nos diba dando'l so promotor, fundador y director dende siempre,
Pepe el Ferreiro.
Víase que yera un namoráu del so trabayu, disfrutaba enseñándonos aquellos tesoros milagrosamente rescataos por él del escaézu y transmitíanos el so apasionamientu contaxosu.
Güei
Pepe el Ferreiro ta fulminantemente destituyíu en sin que se diera una esplicación afayaíza de los motivos. Al contrariu, les dos persones con más autoridá científica y moral del consorciu que xestionaba'l muséu, los catedráticos de la Universidá d'Uviéu,
Alfonso Fernández Canteli y
Gonzálo Morís, mostráronse indignáos pola arbitrariedá d'esi despidu improcedente ya indecente. Y miles de persones y organizaciones cíviques dexaron constancia del so sentir frente a la inxusticia onde y como pudieron, en Grandas, n’Uviéu y por internet.
En cualquier otru llugar del mundu
Pepe el Ferreiro sería oxetu de multitú d'homenaxes. Tendría una cai o una plaza col so nome nel pueblu que él supo poner nel mapa, el muséu que llevantó de la nada llevaría tamién una placa conmemorativa, el so bustu'n piedra o bronce, un monumentu, y ya nun habría sitiu nes vitrines pa tantos reconocimientos y medalles como merez.
Pero’n llugar de nomálu presidente vitaliciu d'honor, dan-y la patada, a dos años de la xubilación, y onde más-y duel, piesllando-y les puertes al so propiu llar, qu'eso yera pa él esti muséu.
Evidentemente eso diz mui poco de la calidá humana de los responsables, y de la dignidá de la persona que acepta’l cargu n'eses condiciones pa sustituílu, mas nun corresponde a naide xulgar la catadura ética y moral de les persones, sos motivos ya intereses tendrán pa ser como son.
Pero sí que podemos albidrar el verdaderu interés pola cultura y por Asturies en xeneral de los responables políticos de la Federación Socialista Asturiana (PSOE). Porque esta forma del so facer nun ye un fechu aisláu. Ye una confirmación.
Al otru lláu d'Asturies, otru home, mayor tamién,
Txomín Goñi, ye procesáu por lluchar cívicamente escontra la especulación y el destrozu de Llanes. Vése obligáu a facer una güelga fame pa defendése de les “terribles” acusaciones de llevar una camiseta cola lleenda 'La Talá ilegal' nel plenu municipal. Lleenda que además de nun ofender nin dir contra naide, demostróse cierta polos tribunales.
Y nel centru aténtase en sin escrúpulu contra'l monumentu de referencia de Xixón, La Llaboral, asólase'l verde axardináu del so entornu inmediatu con enormes aparcamientos de superficie, llevántense tallerones industriales apegáos y pretende edificáse alredor, si los vecinos y amigos de Cabueñes nun son a evitalo, una auténtica Ciudá Satélite, a cinco kilómetros del cascu urbanu.
Y cuando otru home, mayor y respetable tamién, el doctor
Paco Cadórniga, s'atreve a denunciar los posibles pelotazos urbanísticos y el mangoneo qu'arrodia la operación, ye recibíu poles másimes autoridáes con ninguneo, despreciu, insultos de 'mal ciudadanu' y portazu nel focicu.
Lo mesmo pasa nes excavaciones de La Carisa, n’Asturies montañosa del sur, na Sierra de Carondio,nel abandonu del Muséu Arqueolóxicu, nel despreciu pa col nuestru prerrománicu. Lo de Pepe el Ferreiro ta claro que nun vien motivao por “diferencies personales coles autoridaes llocales”, nin por “descuidos menores na xestión”. La orden vien de más arriba y obedéz a un plan. Nun-yos basta a los nuestros “representantes ” con tener abandonáu’l patrimoniu asturianu, hai que destruílu dafechu. Y cualquier
Pepe el Ferreiro,
Txomín o
Paco que s’atreva dir escontra esi “orden natural de les coses” será espelleyáu, coráu ya incineráu públicamente. Como los herexes de la época feudal, o meyor, como los gochos na matanza tradicional, nuna duerna del muséu de Grandas precísamente.
Vaya dende equí’l mio pequeñu homenaxe a
Don José Naveiras Escanlar,
Pepe el Ferreiro, y a tolos que como él son quien a seguir de pie y trabayando a pesar de los pesares. Que sepan que por más que sientan como si’l so esfuerzu d’años argayara y fuera inútil, nun ye asina, quedarános el so llabor y exemplu por siempre.
Gracies Pepe.
