Cabueñes asegura que’l gobiernu municipal nun collabora cola xusticia asturiana

Cabueñes asegura que’l gobiernu municipal nun collabora cola xusticia asturiana

Los vecinos mantienen la so llucha contra’l plan parcial previsto na parroquia xixonesa

POLÍTICA Xueves, 21 de Xineru de 2010 12:41

La Plataforma Ciudadana Contra’l Muru de Cabueñes ta acabante de facer públicu un comunicáu nel que denuncia “l’ausencia de l’adecuada y dilixente cooperación del gobiernu municipal de Xixón cola xusticia asturiana”. El colectivu refierse al procesu contenciosu alministrativu que tien interpuestu contra’l Plan de Cabueñes que proyecta un cambiu radical na parroquia cola construcción de 600 viviendes con dellos bloques d’edificios, la mayoría de cuatro altures. Un cambiu que fadría desapaecer el Cabueñes rural que güei conocemos.

El colectivu ciudadanu esplica cronolóxicamente los pasos que vien dando dende’l 28 de mayu del 2008, cuando, en conceyu, decidió pleitear no alministrativo contra esti plan y, no penal, contra Ovidio Blanco, ex arquitectu xefe municipal, poles operaciones que fixo con un terrén incluíu nel plan parcial y col que se llevó una plusvalía de 600.000 euros. Pese a esta decisión, la Plataforma ofreció al Conceyu la posibilidá de rectificar y renunciar al Plan de Cabueñes, dalgo que’l gobiernu municipal decidió estudiar fuera del orde del día pa depués desestimar la petición vecinal.

Ello llevó a esta organización a interponer un recursu contenciosu.alministrativu’l el 29 d’ochobre del 2009 contra la resolución de la xunta de gobiernu municipal que’l Tribunal Superior de Xusticia d’Asturies almitió a trámite’l 11 de payares. Esti órganu admitió a trámite’l recursu y solicitó al Conceyu de Xixón l’espediente alministrativu del Plan parcial nun plazu de venti díis.
Meses depués, en concreto’l pasáu llunes, esti tribunal tuvo que requerir de nuevu al Ayuntamientu pa que despache correctamente l’espediente, con atención a la notificación d’interesaos.

Pa la Plataforma, l’actitú del Conceyu demuestra “la xestión ineficaz y chapucera de lo público n’urbanismu, la so falta de rigor, la tresparencia nula y un interés escasu por atender a la xusticia y a los ciudadanos”. Amás, el colectivu considera que ello “podría interpretase como una forma interesada d’obstaculizar un procesu abiertu, con conocimientu de la illegalidá y nulidá d’esti Plan parcial”. “¿Qué tien qu’esconder de nuevu l’equipu de gobiernu en Cabueñes?”, entrúguense los vecinos, que no renuncien a la derrota llegal del Plan na vía alministrativa “con independencia del procesu penal lentu contra l’arquitectu municipal, del que siguimos a la espera de novedaes”.


Noticia publicada en Infoasturies el 21 de xineru de 2010